Jaiotzak %6,4 gutxitu ziren iaz Euskadin

Euskadin gero eta haur gutxiago jaiotzen da. Jakina zen, baina datuak argigarriak bezain kezkatzeko modukoak dira. Iaz 17.076 ume jaio ziren Euskal Autonomia Erkidegoan, aurreko urtean baino %6,4 gutxiago. Bertoko eta Estatuko gainerako lurraldeetako amen artean jaitsiera %7,5ekoa izan zen, eta %2,4koa atzerritarrei dagokienez. Zifra zehatzetara joz, Gipuzkoan 5.593 haur jaio ziren 2017an zehar, eta jaitsiera %7koa izan zen, hiru lurraldeetako handiena. Bizkaian, aldiz, 8.522 ume munduratu ziren (2016an baino %6,9 gutxiago); eta Araban beherakada %3,7koa izan zen, 2.961 ume jaio eta gero. Eustaten datuen arabera, mila biztanleko 7,8 jaiotzakoa izan zen iaz jaiotza-tasa Euskadin, Espainiakoaren azpitik, behin-behineko datuen arabera Estatu osokoa 8,4koa izan baitzen. Zifrarik handiena Arabakoa izan zen, %9,1; Gipuzkoakoa bigarrena, %7,8; eta Bizkaikoa azkena, %7,5.
Talde ugariena 30 eta 34 urte bitarteko emakumeena izan zen, jaiotza guztien %36 horiei dagozkielako. Hala eta guztiz ere, 2016an baino zazpi hamarren azpitik geratu ziren iaz. Ostekoa 30-39 urte bitarteko amena izan zen, jaiotza guztien %34,7rekin, aurreko urtean baino bi hamarren gutxiagorekin. 40 urtetik gorakoena izan zen jarraikoa, gero eta handiagoa baita, %10,1ekoa 2017an, aurreko urtean baino sei hamarren gehiagorekin. 25-29 urte bitarteko amen jaioberriak %13,5 izan ziren, bi hamarren gehiago; eta 20-24 bitartekoena, %4,5, hamarren bat gehiago. Ama nerabeak guztien %1,2 izan ziren, aurreko urteko zifra berbera.
Amen jaioterria kontuan hartuta, %22,3 atzerritarrak izan ziren, eta 3.810 haur ekarri zituzten orotara. 2016an, aldiz, %21,4 ziren ama atzerritarrak. Nazionalitate hauetakoak izan ziren ama gehienak: 735, Marokokoak; 347, Errumaniakoak; 247, Kolonbiakoak; 210, Boliviakoak; 194, Nigeriakoak; 181, Paraguaikoak; 164 Nikaraguakoak; 123, Ekuadorkoak; 119, Aljeriakoak; eta 116, Brasilgoak. Euskal Autonomia Erkidegoan bizi diren Estatu osokoak baino urte gutxiagorekin izaten dira ama emakume atzerritarrak. 30 urte baino gutxiagorekin atzerritarren %40,7 izan da ama, eta Estatukoen %13 besterik ez. Amen batezbesteko adina 33,5 urtekoa izan zen. Espainiarren artean, 34,3koa; eta atzerritarrei dagokienean, 30,8koa. 2017an ama lehen aldiz izan zirenen batezbesteko adina 32,6koa izan zen.
Iaz ezkontzatik kanpoko jaiotzak 7.492 izan ziren, aurreko urtean baino %4,7 gutxiago. Horiek guztien %43,9 dira, 2016koak %43,1 izan ziren bitartean. Bizkaiko eta Arabako ehunekoak Euskadiko batezbestekoaren gainetik egon ziren, %45,4 eta %44,1 hurrenez hurren. Gipuzkoan, aldiz, %41,4 izan ziren. Duela hamar urte %27 ziren ezkontzaz kanpo jaiotzen zirenak.
Bizirik jaiotakoen arteko erlazioa honakoa izan zen: 100 neskatoko 107 mutiko. Mutilen batezbesteko pisua 3.307 gramokoa izan zen, eta neskatoena 3.211koa. Erditzeak 16.767 izan ziren: horietatik 16.389 bakunak; 374 bikoitzak; eta 4 hirukoitzak. Garaiz aurrekoak, ostera, 935 erditze izan ziren, guztien arteko %5,6.

Euskadiko jaiotza-tasa mila biztanleko 7,8koa besterik ez da.

Categoría: euskara , Joseba Arruti , Sociedad