Kritika Sariak

Unai Elorriaga eta Felipe Juaristi dira 2014ko Kritika Sarien irabazleak, zapatu honetan Pontevedran jakinarazi denez. Zehazki, lehenari narratiba sailean egin diote gorazarre, ‘Iazko hezurrak’ lanari esker, eta bigarrenari poesiari dagokionean, ‘Piztutako etxea’rekin. Sariok 1976tik banatzen ditu Espainiako Literatura Kritikoen Elkarteak, eta gazteleraz argitaratutako liburu onenak nabarmentzeaz gain, katalanezkoak, galizierazkoak eta euskarazkoak ere aintzat hartzen dituzte. Dagoeneko oso luzea den sarituen zerrendan euskal idazle garrantzitsuenetakoak daude, eta ia inor falta ez dela esan liteke. Izen horien artean daude Bernardo Atxaga, Joseba Sarrionandia, Joan Mari Irigoien, Anjel Lertxundi, Pako Aristi, Harkaitz Cano, Kirmen Uribe eta maila handiko beste hainbat idazle.  

Elorriagaren kasuan, bere nobelako “pertsonaiak biolentziarekin duen obsesioa” eta erakusten ei duen “giza izaeraren ikuspegi ezkorra” azpimarratu dute epaimahaikoek, eta Juaristirenean, aldiz, “pieza abstraktoen eta molde humanistagoa dutenen arteko uztarketa”. Bata zein bestea izen handiak dira euskarazko letretan, eta ondo merezitakoa dute orain jasotako saria. Bi hauez gain, edizio honetan saritu dituztenak honakoak dira: Andrés Ibáñez eta Lorenzo Oliván (gazteleraz), Toni Sala eta Màrius Sampere (katalunieraz) eta Xabier Quiroga eta Gonzalo Hermo (galizieraz). Sariak banatzen dituen elkarteko presidente Ángel Basanta jaunak berauen prestigioa azpimarratu zuen, diruzkoa izan ez arren, eta horiek gabe “lau hizkuntzetako literaturaren historia ulertu ezin” daitekeela iritzi zion.

Hainbat idazlan hedabideetara eramaten dituzten aukera guztiak oso garrantzitsuak dira beti euskarazko literaturarentzat. Irakurle gehiagoren premia gogorarazteko ere aproposak izaten dira sari banaketak, kalitate beharrean ez daudelako euskarazko narratiba eta poesia. Bestelako hizkuntzetan irakurtzeaz gain, bertokoari ere aukera eman behar zaio noizean behin, eskuartera eramandako askok onerako harrituko bagaituzte. Elorriaga eta Juaristi beste askoren arteko idazle handi bi dira, euskararen harrobia aberatsa baita, zorionez. 

Categoría: Joseba Arruti