Junkeraren 35ak

Herri batek mundu zabalean izan ditzakeen enbaxadore onenak kulturarekin lotutakoak izan ohi dira. Eta gurean Kepa Junkerari asko zor diogu, maila goreneko erakustaldien bitartez ezagutzera eman gaituelako hainbat bazterretan. Ibilbide oparoa du dagoeneko musikaren munduan, 35 urtekoa zehazki. Eta horiek gogoratzeko ‘Hauspo ibiltaria’ izeneko erakusketa zabaldu berri da Azkuna Zentroan maiatzaren 3a bitartean. Aurkezpenean esan zutenez, Errekaldekoaren unibertsoari buruzko “zentzumen, ikusmen eta soinu erakusketa” da honakoa. Bertan ikusgai dagoenaren bitartez, Junkeraren hainbat alde ezagun eta ezezagunetan sakondu ahal izango da, bere kontzertuei eta bidaiei lotutakoetan eta baita hainbat alorretako pertsonaia garrantzitsurekin izandako harremanei buruzkoetan ere.

Junkerak “trikitiaren mundua irauli eta euskal musikaren ikuspegia aberastu” duela uste dute erakusketa antolatzen ibili direnek, eta ezin zuzenago dabiltza. Aski ezagunak dira trikitiaren inguruan egin dituen ikerketa lanak, berea duen tresna beste batzurekin mestizajean uztartzeko besteak beste. Horrek bide berrietara eraman du euskal musika, beste hainbat lekutako musikekin kidetzearekin batera. Bilbotarra ez da, beraz, musikari soila, ikertzaile zereginetan emankor aritze horrek hainbat esparrutara zabaldu baitu bere itzala. Alde horretatik, Azkuna Zentroko erakusketak ikuspegi zabala eskaintzen du Euskal Herrian nortasun berezi eta ibilbide aberatsekoa den sortzaile honen inguruan.

Musikak aparteko garrantzia izan du beti euskal kulturan, baita euskararen transmisioan ere. Eta azken hamarkadotan goi mailako protagonista izan direnen arteko aipagarrienetakoa da Kepa Junkera. Erakusketa hau aukera ezin hobea da guzti hori hobeto ezagutzeko, egindakoaz hausnartzeko eta aurretik datorrenaz ohartzen hasteko. Gure-gurea denetik xume abiatu, edonon txalotzeko moduko kalitatez jantzi eta besteenekin naturaltasunez bat egiten jakiteko maisua izan behar da. Hori da ‘Hauspo ibiltaria’k utzi duen arrastoa. 

  

Categoría: Joseba Arruti