Egindakoaren balantzea

Azken asteotan ez dago besterik hedabideetan: tantaka bezala, herri guztietako alkatetzetarako aurkeztuko dituzten hautagaien izen-abizenak ezagutzera ematen ari dira alderdi ezberdinak. Udal bozak herritarrengandik gertuenekoak dira eta, neurri batean, maila politiko soila gainditzen dute, giza ikutua erabakigarri egiteraino. Siglek garrantzia dute, noski, baina pertsonek inoiz baino gehiago eragiten dute azken hautua egiterakoan. Maiatzaren 24an hauteslekuetara hurbiltzen direnek, soinean daramaten zerrendako gehienak ezagutuko dituzte. Eta hiri handienetan ere, bat baino gehiago. Hala, auzokide horien konpromisoa eta lan gaitasuna neurtzeak baldintzatuko du batzuen edo besteen aldeko apustua, boz horietarako propio egindakoa.

Norbera bizi den udalerria hobetzen laguntzea lanik ederrenetakoa da, zalantzarik gabe. Gehienetan, gainera, ez da inolako anbizioarekin lotutako asmoak bultzatutakoa izaten, besteen alde jardutekoak baino. Euskadin sekulako jauzia egin da azken hamarkadotan herrigintza horretan aritu diren hainbat eta hainbat gizon-emakumeren lanari esker. Ez da bakarrik denborak aurrera egiteak ohikoan dakarren hobekuntza izan, egitasmo sendo askoren eta kateatutako konpromiso eskuzabalen ondorioa baino. Politikaren aurkako hainbat adierazpen egiten diren honetan, ezinbestekoa da udaletan gogor lan egin duten guztien ekina aintzat hartu eta eskertzea. Eta hori egiteko modu eraginkorrena bozkatzea da.

Bizi garen udalerria azken hogeita bost urteotan zelan hobetu den ikusteak perspektiba ematen digu. Politikak aurpegi on asko ere badituelako, bokazioz, gardentasunez eta eraikitzeko gogoz ekiten zaionean. Gure alkate eta zinegotzi gehienek horretan eman dituzte urteak, eta lorpenak begibistakoak dira. Ez bakarrik agindu dutenei dagozkienak, egindakoa oposizioko zereginetatik hobetzen lagundu dutenena ere badelako horren zati bat. Eta guzti horiekin batera, beste herritar asko talde sozialetatik aritu dira, hori ere ekarpenak egiteko modu ezin hobea baita.  

Elkarlana da etengabeko hobekuntzarako giltzarria. Horregatik merezi du batzuek eta besteek hemendik aurrerakoan proposatzen digutena sakon aztertu eta egokien irizten diogunaren alde egitea. Guztion partehartzeak ekarri gaitu gauden honetara. Eta horrexek eramango gaitu bizi-kalitatez eta azpiegituraz gero eta hobeto hornitutako udalerriak izatera. Kale mailako politika xume horretatik abiatuta hainbat gauza onerako alda daitezkeelako.

Categoría: Joseba Arruti